о Искусство

Ачасен музыка университечĕ

Вăрмарти ачасен искусство шкулĕнче вĕренекенсен ăс-тăнне эстетика, музыка енĕпе пуянлатас, вĕсен канăвне усăллă ирттерес тĕллевпе музыка университечĕ йĕркеленĕ.

Юлашки икĕ вĕренỹ çулĕнче ăна теори уйрăмĕн пуçлăхне Е.Ефимов преподавателе шанса панă хыççăн мероприятисем уйрăмах ăнăçлă та тухăçлă иртсе пыраççĕ. Çак тапхăрта занятисене композиторсен юбилейĕсене паллă туса йĕркеленĕ. Çамрăк кĕвĕ ăстисем А.Бородин, Н.Римский-Корсаков, М.Глинка вырăс композиторĕсемпе пĕрлех Ф.Лукин, Г.Анчиков, А.Орлов-Шузьм, А.Тогаев, А.Асламас чăваш композиторĕсен творчествипе анлăн паллашрĕç, вĕсен ячĕсемпе кунта музыка бюллетенĕсем кăларчĕç.

Кăçалхи вĕренỹ çулĕнче те ку ĕç ăнăçлăн пырать. Акă вĕренекенсем "Космос теми -музыкăра" - Андриян Николаев космонавт - 75 çул, В.Кривоносов - чăваш композиторĕ - 100 çул, А.Шнитке хальхи тапхăрти композитор - 70 çул тултарнă юбилейĕсене палăртса тĕрлĕрен мероприятисем ирттерчĕç те ĕнтĕ. Ку мероприятисене ачасем йышлăн çỹрерĕç.

Кăçалхи вĕренỹ çулĕнчех шкул ачисем Д.Кабалевскийĕн - 100, А.Лядовăн 150 çулхи юбилейĕсене анлăн паллă тăвĕç, унпа пĕрлех Аслă Çĕнтерỹ 60 çул тултарнă ятпа хатĕрленĕ "Аслă вăрçă тапхăрĕнчи музыка" теми анлăн çуталĕ. Университет занятийĕсене ăнăçлă, пысăк пахалăхпа ирттерес енĕпе теори пуçлăхĕ Е.Ефимов кунти педагогсене активлăн хутшăнтарать. Ку енĕпе уйрăмах: М.Чернова, А.Николаева, Л.Ковалевская, А.Ефимова, А.Горбунова тата ытти педагогсем те пысăк тăрăшулăх кăтартнине палăртмалла.

Университетри занятисем вăл темăсемпех Мăнçырма, Арапуç, Энĕшпуç шкулĕсенче те лайăх иртрĕç.

Ачасен музыка университетне йĕркеленипе вĕренекенсем искусство тĕнчине ытларах кĕрсе пыраççĕ, хăйсен пĕлĕвне, тавракурăмне ỹстереççĕ, музыкăна татах та ытларах юратма хăнăхаççĕ, эстетикăлла тĕрĕс воспитани илеççĕ, хăйсен канăвне те усăллă ирттереççĕ.

Н. ИВАНОВ,

шкул завучĕ,

чăваш халăх академикĕ.