о Комисси ларăвĕ

Халăх дружинисем - йĕрке хуралĕнче

Район депутачĕсен Пухăвĕн саккунлăха, право йĕркине çирĕплетес, вырăнти хăй тытăмлăха аталантарас, депутат этики тата райадминистраци çумĕнчи право йĕркисене пăсасран асăрхаттарассипе профилактикăлла ĕçсем туса ирттерес енĕпе ĕçлекен комиссисен пĕрлехи ларăвне депутатсем, комисси членĕсем, поселок тата ял администрацийĕсен пуçлăхĕсем, правăна сыхлакан органсен руководителĕсемпе сотрудникĕсем, ирĕклĕ халăх дружинисен командирĕсем хутшăннă.

Район депутачĕсен кăçалхи март уйăхĕнче пулса иртнĕ Пухăвĕн ларăвĕнче районта обществăлла йĕркелĕхе сыхлассипе ирĕклĕ халăх дружинисем ЊДНДЌ çинчен калакан положенине çирĕплетнĕ. Унпа килĕшỹллĕн районта пурĕ 18 халăх дружини йĕркеленĕ. Вĕсен ĕç-хĕлне 8 çынран тăракан халăх дружинисен совечĕ йĕркелесе пырать.

Дежурствăра тăракан халăх дружинисем районти пур ялсенчи йĕркелĕхе те сăнаса тăраççĕ. Паян халăх дружинисенче 221 дружинник, тĕрĕсрех каласан, агропромышленность комплексĕпе бюджет тытăмĕнче тăрăшакансем - 85 процент, çав шутра пенсионерсемпе ĕçсĕррисем те хăйсен тỹпине хываççĕ. Районти халăх дружинисем планпа килĕшỹллĕн графикпа дежурствăна тухаççĕ. Вĕсем право йĕркисене пăсассинчен асăрхаттарас тĕлĕшпе тĕрлĕрен профилактикăлла ĕçсем туса ирттереççĕ. Тĕслĕхрен, харпăр хăй тĕллĕн патруле тухаççĕ, ашшĕ-амăшĕсен шкулти комитечĕпе, йĕрке хуралçисемпе пĕрле хăрушсăрлăхшăн тăрăшаççĕ. Иртнĕ уйăхсенче халăх дружинникĕсем ШĔП сотрудникĕсемпе пĕрле хуçалăхсенче, коллективлă участоксемпе çынсем пахчисенче çитĕнтернĕ тухăçа сăтăрçăсенчен хураллассипе рейдсем ирттернĕ.

Хĕл сиввисем çитнĕ май йĕрке хуралçисемпе ашшĕ-амăшĕсен комитечĕ хутшăннипе, çул çитмен ачасем тỹнтерле ĕçсем тăвассинчен сыхланса, поселокри нумай хваттерлĕ çуртсен путвалĕсене тĕрĕслессипе те рейдсем йĕркеленĕ.

2004 çулхи октябрь, ноябрь уйăхĕсенче районти халăх дружинисем харпăр хăй тĕллĕн 197 хут патруле тухнă, ШĔП сотрудникĕсемпе - 42, массăллă мероприятисенче, уявсенче, обществăлла вырăнсенче йĕркелĕхе сыхлассипе - 67, ашшĕ-амăшĕсен шкулти комитечĕпе пĕрле патрульте 98 хут пулнă, ШĔП ирттернĕ профилактикăлла мероприятисене 18 хутшăннă, право йĕркисене пăснă 10 çынна районти шалти ĕçсен пайне леçнĕ тата ытти те.

Районти халăх дружинин командирĕ Н.Степанов уйрăмах лайăх ĕçленĕ халăх дружинисене палăртса хăварчĕ. Вăрмар поселок, Шăхаль, Мăнçырма, Аслă Чак, Шăплат, Энĕшпуç ял администрацийĕсем çумĕнчи халăх дружинисене ырăпа асăнса хăварса дружинниксем хăйсен тивĕçĕсене тỹрĕ кăмăлпа пурнăçласа пынине палăртрĕ, çав вăхăтрах хăш-пĕр ял администрацийĕсен территорийĕсенче япăх ĕçленине каласа хăварчĕ. Малашне те районти йĕркелĕх хуралĕнче тăрăшакансемпе пĕр тĕвĕре, пĕрлешỹре ĕçлесе граждансен Раççей Конституцийĕ панă прависемпе ирĕкĕсене хỹтĕлесси, çавăн пекех право йĕркисене пăсассинчен профилактикăлла ĕçсем туса ирттересси тĕп тĕллев пулнине çирĕплетрĕ.

Ларура çул çитмен ачасемпе вĕсен прависене хỹтĕлес, вĕсен хушшинче право йĕркисене пăсассинчен сыхлас енĕпе ĕçлекен районти комисси ĕçĕ çинчен райадминистраци пуçлăхĕн заместителĕ Л.Голубева каласа пачĕ.

2004 çулхи 11 уйăхра пурĕ 28 лару ирттернĕ. Унта административлă право йĕркисене пăснă 150 тĕслĕх сỹтсе явнă, çав шутра çул çитмен ачасем пирки - 13, хăйсен ачисене тĕрĕс воспитани парса ỹстерессинчен пăрăннă 135 ашшĕ-амăшĕсем çинчен. Тишкерỹ ирттернĕ май, 100 çынна асăрхаттарса хăварнă. Раççей Федерацийĕн административлă право йĕркисене пăсни çинчен калакан Кодексĕпе килĕшỹллĕн 47 çынна штраф тỹлеттернĕ.

Учетра тăракан çул çитмен 16 ачана Куславккари "Суворов шкулĕ" çарпа спорт лагерьне ăсатнă.

Çул çитмен ачасемпе ĕçлекен районти комиссипе районти шалти ĕçсен пайĕнчи инспекторсем, райадминистрацин вĕрентỹ, социаллă хỹтлĕх пайĕсенчи ĕçченсем йывăр лару-тăрăва кĕрсе ỹкнĕ 75 çемьере пулса пурăнмалли условисене тĕрĕслесе акт çырнă, ашшĕ-амăшĕсемпе, ачисемпе калаçусем ирттернĕ.

2004 çулхи ноябрĕн 1-мĕшĕ тĕлне çул çитмен ачисене тĕрĕс воспитани парса ỹстерессинчен пăрăнакан 89 çемье учетра тăрать.

Кăçалхи ноябрьтен тытăнса 2005 çулхи апрельччен районта "Безнадзорные дети" рейд ирттерме палăртнă. Çавăнпа килĕшỹллĕн йĕркеленĕ ĕçлĕ ушкăнсем кашни шкултах профилактика кунĕсем ирттерме планласа графиксем тунă. Хальхи вăхăтра вĕсем районти 19 шкултан 15-шĕнче пулса профилактикăлла ĕçсем туса ирттернĕ.

Доклада сỹтсе явса районти шалти ĕçсен пайĕн çул çитмен ачасемпе ĕçлекен С.Михайлова инспектор çул çитмен ачасем хушшинче преступлени тăвасси çултан-çул ỹссе пынине çирĕплетнĕ, ку обществăшăн пысăк хăрушлăх пулнине палăртса мерăсем йышăнма сĕннĕ.

Сỹтсе явнă ыйтусем тăрăх тивĕçлĕ решенисем йышăннă.

В. ГУРЬЕВА.