Асăну каçĕсем

Вăрмарти ачасен искусство шкулĕнчи коллективран В.Мироновпа В.Константинов преподавательсем вăхăтсăр уйрăлса çĕре кĕнĕренпе 10 çул çитнине паллă туса нумай пулмасть асăну каçĕсем ирттерчĕç. Иккĕшĕ те кунта çамрăк ăрăва труба çинче выляма, теори ыйтăвĕсене алла илме хăнăхтарнă. Асăну каçĕсене ирттерме ачасен искусство шкулĕн залне поселок çыннисем, вĕсен тăван-хурăнташĕсем, пĕлĕшĕсем, преподавательсемпе вĕренекенсем йышлăн пухăнчĕç. Концерт программинче ытларах труба валли çырнă кĕвĕсем шăранчĕç, шкулти оркестрсем, юрлакансем, уйрăмшар солистсем те пулчĕç унта. Вырăс, чăваш, ют çĕршыв композиторĕсен асра юлакан произведенийĕсем ăнăçлăн та пысăк туйăмпа шăранчĕç.

Асăну каçĕсене кил-йыш, тăванĕсем, пĕлĕшсем, çывăх çыннисем, шкулта ĕçлекенсем В.Мироновпа В.Константинов педагогсем çинчен нумай ăшă та ырă сăмахсем каларĕç, мероприятисене пуянлатрĕç.

Асăну каçĕсене Л.Ковалевская преподаватель ертсе пычĕ. Вĕсене йĕркелесе ирттерсе ярас ĕçре Е.Ефимов, А.Иванов, А.Ефимова, М.Чернова, Т.Гаврилова, О.Трифонова, М.Михайлова, А.Васильева, Г.Тукмакова, С.Васильева, В.Павловская, Г.Димитриева, З.Румянцева, А.Стрелкова педагогсем уйрăмах активлăн хутшăнчĕç.

Н. ИВАНОВ,

РСФСР тата ЧР культурăн тава тивĕçлĕ ĕçченĕ.