Кайăк грипĕ пирки мĕн пĕлмелле?
Кайăк грипĕ пирки мĕн пĕлмелле?
Юлашки вăхăтра чи хумхантаракан ыйтусенчен пĕри кайăк-кĕшĕк грипĕ пулса тăчĕ. Мĕнле те пулса вăл республикăна, района ан çиттĕрччĕ. Хальлĕхе пирĕн тăрăхра лăпкă, анчах сыхă пулни нихăçан та чăрмантармасть. Эппин, мĕн пĕлмелле-ха кашни çыннăн?
1. Çак чир кайăк-кĕшĕке чирлĕ кайăксенчен сывлăш, апат-çимĕç урлă, вĕсен айне сарса панă япаласенчен лекме пултарать.
2. Çынсен кайăк-кĕшĕке пăхнă, пуснă чухне асăрхануллă пулмалла, чир тĕрлĕ сурансем урлă, лайăх пĕçерсе çитермен çăмартаран, аш-какайран лекме пултарать.
3. Грипп вирусĕ аш-какая, çăмартана 10-15 минут хушши вĕретсен вилет.
4. Чир паллисем: кайăксем хускаласшăн мар, пĕрмаях пуçĕсене суллаççĕ, мăйĕ пăрăнать, сăмсаран юн каять, шывра та йĕркеллĕ ишеймеççĕ.
5. Енчен те виле кайăк куртăр пулсан е килти кайăк-кĕшĕк чирлет тесе шутласан, пĕр тăхтаса тăмасăр Чăваш Республикинчи Россельхознадзорăн управленине 42-19-03 (ветеринари надзорĕ), 65-55-46 (сунар надзорĕ), "Вăрмар районĕнче выльăх-чĕрлĕх чирĕсемпе кĕрешекен" патшалăх учрежденине 2-10-34 номерлĕ телефонсемпе шăнкăравламалла.
6. Тытнă кайăксене киле илсе килмелле мар.
7. Кайăк-кĕшĕк ăшчиккине çулăм умĕнче кăлармалла.
8. Çăлнă тĕке çунтарса ямалла, кĕлне çĕр ăшне çур метртан кая мар чавса хумалла.