Вут-çулăм ан алхастăр
Вут-çулăм ан алхастăр
Алхасакан вут-çулăм хăрушлăхне, вăл мĕн тери пысăк сиен кỹнине хăшĕ-пĕрисем курнă. Кĕске вăхăтра вăл кил-çурта, япаласене кĕл тăвать. Хăш-пĕр чухне çыннăн пурнăçне те вăхăтсăр татать. Пушар чăннипех те хăрушă инкек. Пирĕн республикăра пушарсем паян кун та час-часах тухаççĕ. Промышленноçпа ял хуçалăх предприятийĕсем, выльăх-чĕрлĕх фермисем, складсемпе магазинсем çуна-çуна каяççĕ.
Унăн сăлтавĕ пĕрре - çынсен тимсĕрлĕхĕ, пушартан хỹтĕленмелли правилăсене пăхăнманни. Кăçал пирĕн районта 8 пушар тухнă, унта çыннăн пурнăçĕ вăхăтсăр татăлнă тĕслĕх пулман. Тăкакĕ - 14600 тенкĕлĕх. Пĕлтĕр çак вăхăта 15 пушар пулнă, унта 7 çыннăн пурнăçĕ татăлнă. Тăкакĕ - 250000 тенкĕлĕх. Вут-çулăма алхасма памасăр вăхăтра сỹнтересси нумай чухне хамăртан килет: вăхăтра пушар хуралне шăнкăравлани, пушар хурал çыннисене кĕтсе илсе тĕрĕс çул кăтартса сỹнтерме пулăшни, ял тăрăхĕсенче çулсене тасатни тата ытти те.
Районти пушар хуралĕнче 2 пушар машини яланах хатĕр, юсавлă тăраççĕ. Ялсенчен пушар инкекĕ пирки пĕлтернĕ пулсассăн, пĕр машини çийĕнчех тухса каять, поселока вара - иккĕшĕ те. Районти хăш-пĕр ялсем аякри вырăнта вырнаçнă, çавăнпа та çитме йывăр. Хăшĕ-пĕрисен вырăнти пушар командисем ĕçлемеççĕ. Пушар тухрĕ пулсан, çынсем хăйсенех, пушарçăсем çитессе кĕтсе тăмасăрах, вут-кăварпа кĕрешме, ăна сỹнтерме тăрăшмалла, айккинче тăрса юлмалла мар. Пĕлсе, çине тăрса ĕçлени пысăк усă кỹрет.
Районти пушар хуралĕ Чăваш Республикинчи Раççей Федерацийĕн чрезвычайлă лару-тăру министерствин тĕп управленийĕ ирттерекен тĕрлĕ ĕçсене хутшăнать. Пушар сỹнтерме кăна мар, тĕрлĕ кĕтмен йывăр авари е ытти чрезвычайлă лару-тăрура пулма тивет. Авари е пысăк хăрушлăх пулсан телефонпа районти пушар хуралне 01 номерпе шăнкăравласа пĕлтермелле.
Пушар ан тухтăр тесен, пурин те пушар хăрушсăрлăхĕн правилисене çирĕп пăхăнмалла, унăн тискерлĕхĕ çинчен пĕр çеккунтлăха та манмалла мар.