Çемьерен хакли нимĕн те çук
о Çул çитмен ача
Çемьерен хакли нимĕн те çук
Ачана çуратни çеç çителĕксĕр, ăна кирлĕ пек пăхса, вăй-халран та, ăс-тăнран та тĕрĕс-тĕкел çитĕнтермелле. Ашшĕ-амăшĕн тивĕçĕсене пĕр çеккунтлăха та манас марччĕ. Анчах та хăш-пĕр чухне "куккукла" амăшĕсем те тĕл пулаççĕ.
Пĕчĕк ача малтанхи вăхăтра пурнăçра мĕн тума юранипе юраманнине тавçăрса илеймест, чылай чухне тĕрлĕ ĕçсене ăнланмасăр тăвать. Кун пек чухне ачана ăнланма тăрăшмаллах, тỹрех алла чĕн пиçиххи е патак тытса "ăса" кĕртмелле мар пулĕ тетĕп. Ку вăл воспитани меслечĕ пулмĕ. Тăтăшах патак "çисе" ỹсекен ачан мĕн пĕчĕкренех аслисем патне шанчăк пĕтет, ĕненми пулаççĕ. Ашшĕ-амăшĕнчен ача писет. Вăл вара урăх çĕрте, вăрттăн, никам курман вырăнта "лăпкăлăх" шырать. Ку вара çамрăк чуншăн мĕн ĕмĕрлĕхех тарăн йĕр хăварать. Саккун тăрăх çул çитмен ачасене тивĕçлипе пăхманшăн, вĕсемпе пĕр шелсĕр хаяр пулнăшăн, хĕненĕшĕн ашшĕ-амăшне хытă айăплама, вĕсен правине туртса илсе уголовнăй йĕркепе явап тыттарма пултараççĕ. Çемье ăшшине вара нимĕн те çитеймĕ, унран хакли çук.