Урмарский муниципальный округ Чăваш Республикин Вăрмар муниципаллă округě
«Ир тăракан тутă пулнă»
«Ир тăракан тутă пулнă», -
тенĕ мĕн авалтан ватăсем. Çак сăмахсем çĕр çинче ĕçлесе пурăнакансем пиркиех ĕнтĕ, мĕншĕн тесен вĕсен пĕр канăç та çук. Кĕлкеш ялĕнчи «Возрождение» фермер /хресчен/ хуçалăхĕнче ĕçлекенсен те çавăн пекех. Унăн пуçлăхĕ Н.Ямуков 72 çулхи патвар арçын лара-тăра пĕлмест, ир вăрансан ура çине тăрать те сĕм çĕрлеччен ĕçре. Çавăнпа вăл хăй çулĕнчи пек мар, çап-çамрăк курăнать. Пур çĕре те çитме тăрăшать. Унăн тĕрекĕ - ачисем. Çамрăксене мĕн пĕлнине вĕрентме тăрăшать. Фермер хуçалăхĕнче 400 гектар çĕр - 65 гектарĕ çинчен çĕр улми çитĕнтереççĕ, кишĕр - 5, хĕрлĕ кăшман - 5, çурхи культурăсем - 200, нумай çул ÿсекен курăк 100 гектар çинче, ытти вара хура пусă. «Çĕр улмине кăçал тĕрлĕ сортсем - «Жуковский», «Роко», «Импало», «Невский» лартнă. Пĕр гектартан 150-160 центнер тухать. Сутлăха икĕ вакун ăсатнă, ыттисене путвала хуратпăр», - тет Н.Ямуков. Ĕçлес тесен ĕç тупăнать. Çĕр улмине пухса кĕртме Кĕлкешсемсĕр пуçне Çитмĕш, Чĕкету, Анаткас ялĕсенчен те халăх пуçтарăнать. Ирхине 8 сехетрен пуçласа 17 сехетчен ĕçлеççĕ. Пĕр сехете 25 тенкĕ тÿлеççĕ. Шкул ачисем те хаваспах ĕçе тухаççĕ. Ана тулли халăх çĕр улмине вăхăтра пухса кĕртессишĕн тăрăшаççĕ.
А. НИКОЛАЕВА.