Çуртсем хушăнаççĕ
Пурăнмалли çурт-йĕрĕн ипотека кредичĕсем енĕпе йышăннă программăсене пурнăçласа Чăваш Республики темиçе çул ĕнтĕ ку енĕпе Раççейре малта пырать. 2006 çулта республикăра 8 пин çамрăк çемье пурăнмалли çурт-йĕр туянас енĕпе патшалăх пулăшăвне илнĕ.
Пирĕн район администрацийĕ çамрăк çемьесене çурт-йĕр туянма е çавăрма патшалăх пулăшăвĕ парассипе тĕллевлĕ ĕçлет. 2005 çулта - 11, 2006 çулта - 5, 2007 çулта 6 çемье ипотека кредичĕ илнĕ.
Районта çурт-йĕр хăпартассипе «Урмарская» коллективлă строительство организацийĕ» акционерсен хупă обществи ĕçлет. Çурт-йĕр туянассипе республика тата федераллă программăсем вăйра.
«2010 çулчченхи ялсен социаллă аталанăвĕ» программăпа килĕшÿллĕн ялта пурăнакан çемьесене тата çамрăк специалистсене çурт-йĕр çавăрма федераллă, республика, вырăнти бюджетсенчен каялла тавăрса памалла мар субсидисем уйăраççĕ.
Акă сăмахран, Ыхраçырма ялĕнчи Светлана Львовнапа Анатолий Спиридонович Ивановсем «Ялсен социаллă аталанăвĕ» программăпа килĕшÿллĕн çурт-йĕр çавăрма каялла тавăрса памалла мар субсиди илнĕ. Çак укçа-тенкĕпе вĕсем икĕ хутлă капмар çурт çавăрнă. Эппин, çак пысăк мар ялта çитес çул та çуртсем хушăнасса шанас килет. Ялта çамрăксем тĕпленсен, унăн малашлăхĕ те пур.
З. ЕЛАКОВА.
![]() |