Капмар çурт хăпартнă
«Çемье хăйĕн кил-çурчĕ пулсан çирĕп пулнине пурте пĕлетпĕр. Çурт пулсан çемье тĕреклĕ, тулли, хăтлă», - тет Хĕрлĕçырта пурăнакан Валерий Иванович Ильин. Мĕн ачаран ĕçпе пиçĕхсе ÿснĕ вăл, çавăнпа та хăйĕн пурнăç çулне ялпах çыхăнтарнă.
1965 çулта «За коммунизм» хуçалăхра механизатор пулса вăй хума тытăннă. Халĕ те руль умĕнчен каймасть вăл. Çĕр çинче тухăçлă тыр-пул, пахча çимĕç çитĕнтереççĕ. Мăшăрĕ Галина Трофимовна та хуçалăхра фермăра чылай çул ĕçленĕ. Вĕсем 3 ача пăхса ÿстерсе пурнăçăн анлă çулĕ çине кăларнă.
«2010 çулчченхи ялсен социаллă аталанăвĕ» программăпа килĕшÿллĕн ялта пурăнакан, ĕçлекен çемьесене çурт-йĕр çавăрма федераллă, республика, вырăнти бюджетсенчен каялла тавăрса памалла мар субсиди уйăраççĕ. В.Ильин та ăна тивĕçнĕ. Çак уйăрнă укçа-тенкĕпе капмар çурт хăпартнă.
З. Павлова.