Çыншăн тăрăшсан сăвап пулĕ
Чăваш Республики Президенчĕ Н.Федоров кăçалхи çула «Ырă ĕçсен çулталăкĕ» тесе пĕлтерчĕ. Социаллă хÿтлĕх уйрăмĕнче тăрăшакансен ĕçĕ çак çулпа тачă çыхăннă тесен те юрать.
Пирĕн пата кашни кун тĕрлĕ ĕçпе, ыйтупа ватти те, вĕтти те чылай килеççĕ. Вĕсен ыйтăвĕсене туллин тивĕçтерме тăрăшатпăр. Ватăсене килĕсене пырса пулăшу паракан уйрăмра вăй хуракансем те хăйсен ĕçне тÿрĕ кăмăлпа пурнăçласа пыраççĕ. Кашни çулах кунта çĕнĕлĕхсене ĕçе кĕртсе пыраççĕ. Çакă пире пĕрре те шиклентермест. Уйрăмах çакăнта тăрăшакан социаллă ĕçченсем тата 90 çултан иртнĕ ватăсем пирки ăшă сăмахсем калас килет. Киле пырса пулăшакансен йышĕ паянхи куна илсен 125 çын, вĕсем 160 çынна пăхса тăраççĕ. Çавсен хушшинче икшер, виçшер, тăватшар çынна пăхакансем те пур. Социаллă ĕçченсем хăйсен тивĕçне яваплăха туйса пурнăçлаççĕ, çавăншăн вĕсене ватăсем хисеплеççĕ, хапăл туса кĕтсе илеççĕ.
Пирĕн центрта 90 çул урлă каçнисем 9 çын шутланса тăраççĕ. Вĕсенчен пĕри - 1915 çулхи февралĕн 15-мĕшĕнче çуралнă Хуруйĕнче пурăнакан Анастасия Ивановна Иванова. Мĕн ачаранах ĕçе кÿлĕннĕ вăл. Унăн пурнăçĕ çăмăлах пулман. 1928-1930-мĕш çулсенче вĕсен çемйине Çĕпĕре кăларса янă. 1932 çулта вĕсем каялла тăван яла таврăннă. Унтан килсен ашшĕ вăхăтсăр çĕре кĕрет. Амăшĕ тăватă ачапа тăрса юлать. Тăлăх ачасем амăшĕпе пĕрле тăван «Пионер» колхозра ĕçлеме пуçлаççĕ. Кĕçех Аслă Отечественнăй вăрçă пуçланать. Вăрçă çулĕсенче те Анастасия Ивановнăна çăмăл килмен. Шартлама сивĕре вăрман каснă, окоп чавнă. Часах вăл та çĕре кĕнĕ. Çамрăк хĕр Наçтаç нимĕнле ĕçрен те хăраман, вăй пур таран ыттисемпе шаях ĕçленĕ. Хаяр вăрçă çĕнтерÿпе вĕçленсен çамрăк хĕр колхозăн сысна ферминче ĕçлеме пуçлать, унтанах тивĕçлĕ канăва тухать. «Ĕç ветеранĕ» ята илме тивĕçлĕ пулать. Кайран та алла усса лармасть, вăй çитнĕ таран колхоз ĕçне хутшăнать. Анастасия Ивановнăна 13 çул ĕнтĕ Мария Петровна Александрова социаллă ĕçчен пăхса тăрать. Халĕ хăй те тивĕçлĕ канура, тăтăшах пулăшать. Çакăн пек хастар та ырă кăмăллă çынсем пурри пире чăннипех те савăнтарать.
Н. Александрова.