Урмарский муниципальный округ Чăваш Республикин Вăрмар муниципаллă округě
Стратегин тĕп çул-йĕрĕсене палăртса ĕçлеççĕ
«2020 çулчченхи районăн социаллă-экономикăллă аталанăвĕн стратегийĕнче экономикăн тĕрлĕ отраслĕсенче, социаллă сферăра инфраструктурăна аталантарасси чи кирли, тенĕ. Çакă халăхăн пурнăç условийĕсене ÿстерме пулăшĕ», - тесе палăртнă. Çавăн пекех стратегире промышленность предприятийĕсен аталанăвĕ çинче тĕплĕн чарăнса тăнă. Производствăна çулсерен çĕнетесси, экологи тĕлĕшĕнчен пахалăхлă продукци кăларасси, ĕç процесне автоматизацилесси, инвесторсене активлă явăçтарасси малти вырăнта пулмалла. Хальхи вăхăтра районта пĕр тикĕссĕн аталанакан предприятисенчен пĕри - «Вăрмарти çĕвĕ фабрики» акционерсен хупă обществи. Çĕвĕ фабрикин продукцине Раççейĕн тĕрлĕ регионĕсенче лайăх пĕлеççĕ, ырлаççĕ. Çывхарса килекен профессиллĕ уявне - Çăмăл промышленноç ĕçченĕн тата Республика кунĕсене те вăл пысăк ÿсĕмсемпе кĕтсе илме хатĕрленет. Сăмахран, кăçалхи 4 уйăх кăтартăвĕсем те курăмлă. Çак вăхăтра пурĕ 6 миллион та 330 пин тенкĕлĕх продукци туса кăларнă. Çавăн чухлех сутнă. Пурĕ 15 тĕрлĕ изделисем туса кăлараççĕ кунти ăста алăллă çĕвĕçсем. 4 тĕрлĕ ĕç костюмĕ çĕлеççĕ вĕсем. Хатĕр продукцине Мускав хулине ăсатаççĕ. Пурлăхпа техника базине те çулсеренех вăйлатса пыраççĕ.
«Иртнĕ çул 100 штук çĕнĕ çĕвĕ машинисем пурĕ 2 миллион тенкĕлĕх туяннă. Çавна май тата тепĕр 17 ĕç вырăнĕ йĕркеленĕ. Малашлăх тĕллевĕсем пысăк. Фабрикăна аталантарса, çĕнетсе пырса халăха валли ĕç вырăнĕсем тата ытларах туса парасси», - тет С.Белоусова директор.
Палăртма кăмăллă, паянхи куна кунта 200 яхăн çын тăрăшса вăй хурать. Эппин, кунти хастар çĕвĕçсене малалла та пахалăха тĕпе хурса ĕçлеме ăнăçу сунар.
З. ПАВЛОВА.