Вак предпринимательлĕх вăй илет
Раççейре иртнĕ вак предпринимательлĕх кунне халалласа райадминистрацин ларусен залĕнче районти предпринимательсемпе, предприятисен пуçлăхĕсемпе канашлу иртнĕ. Ăна райадминистраци ĕçĕсен управляющийĕ - организациллĕ ĕçсен пайĕн начальникĕ Н.Павлов уçнă. Райадминистрацин экономика, промышленность, суту-илÿ тата экономика аталанăвĕн пайĕн начальникĕ Н.Краснова 2008 çулхи пĕрремĕш кварталти районти вак тата вăтам предпринимательлĕх ĕçĕсене пĕтĕмлетнĕ, районти социаллă-экономикăллă аталанăвĕн стратегийĕпе тĕплĕн паллаштарнă.
Надежда Ильинична пĕлтернĕ тăрăх, кăçалхи пĕрремĕш кварталта продукци туса кăларассипе лайăх ĕçленине палăртнă. Çавăн пекех халăха ĕç вырăнĕпе те тивĕçтереççĕ. Иртнĕ çулхи çак вăхăтрипе танлаштарсан 74 çын ытларах пулнă. Уйрăм предпринимательсен йышĕ те 640 çынна çитнĕ.
Канашлура 2020 çулчченхи районăн социаллă-экономикăллă аталанăвĕн стратегине тĕплĕн тишкернĕ, предпринимательсем хăйсем енчен сĕнÿсем панă. Стратегире промышленность производствин аталанăвĕ ÿссе пынине лайăх хак панă.
Ĕçне кура - хисепĕ. Предпринимательлĕх ĕçĕнче тÿрĕ кăмăлпа вăй хунăшăн чылайăшĕ районти Хисеп грамотине тивĕçрĕç.
З. ПАВЛОВА.