Асра юлакан тĕл пулу
«Ырă ĕç» тата «Çемье çулталăкĕ» ячĕпе Вăрмарти тĕп библиотекăра тĕрлĕ мероприятисем ирттересси йăлана кĕнĕ. Акă нумаях пулмасть кунти вулав залĕнче Вăрмарти вăтам шкулăн 8-мĕш «а» класра вĕренекенсем йышлăн пуçтарăнчĕç.
Малтанах Эмма Демьянова библиотека историйĕ, ĕçĕ-хĕлĕ тата кĕнекесем ăçта вырнаçни çинчен тĕплĕн каласа пачĕ. Ÿсĕм çитнĕ май вĕсене кăçалтан çакăнта кĕнекесем илме килме сĕнчĕ.
Часах интереслĕ мероприяти пуçланчĕ. Хальхинче ачасен умĕнче Раççей Федерацийĕн писателĕсен тата журналистсен союзĕн членĕ Николай Иванов - Пархатар поэт-композитор пулчĕ. Тĕл пулу каçĕнче хамăр ентешĕмĕр творчествипе Галина Корытникова тата Надежда Тухтаманова тĕплĕн паллаштарчĕç. Алексей Талвир тата Василий Алендей ячĕллĕ литература премийĕсен лауреачĕ Николай Пархатар хăйĕн «Вăрçă суранĕ» поэма сыпăкĕпе, «Юлашки çыру», «Сарапай çăлкуçĕ», «Те арçын вăл - те хĕрех» ятлă сăвăсене пысăк туйăмпа вуласа пачĕ.
Пирĕн композитор нумай юрă – кĕвĕсен авторĕ. Чăваш Республикин музыка обществин тава тивĕçлĕ деятелĕ, республика конкурсĕн лауреачĕ Ефим Ефимов труба çинче, Чăваш Рреспубликин культурăн тава тивĕçлĕ ĕçченĕ, Раççейри халăх пултарулăхĕн творчествин Лауреачĕ Анатолий Иванов баян çинче, искусство шкулĕн аслă категориллĕ преподавателĕсем Николай Ивановăн оркестрпа труба вали çырнă «Элегия» тата «Серенада» кĕввисене чĕрене тивмелле, пысăк туйăмпа шăрантарчĕç.
Чăваш радиопа янракан «Ан кÿрен, манми савни», «Хуркайăксем çитсессĕн кăнтăртан», «Купăс кĕвви янăрать» юрăсене Галина Корытникова çепĕççĕн те чĕре туйăмĕпе юрласа пурне те хавхалантарчĕ. Республика конкурсĕнче мала тухнă Николай Ивановăн «Тăван ен» юррине Маргарита Туринге юрланине чун-кăмăлпа итлерĕç.
Николай Иванов библиотекăна килнĕ тĕл пулу каçне хутшăнакансене пурне те хăйĕн «Ăшă туйăм ытамĕнче» юрă кĕнекине парнелерĕ. Библиотека ĕçченĕсем шкул ачисене «Вăрмар ен – Пархатарĕ» ятлă кĕнеке выставкипе тĕплĕн паллаштарчĕç. Юлашкинчен Николай Пархатар вĕренекенсене ăнăçу, ырлăх-сывлăх, вĕренÿре ÿсĕмсем тума, пурнăç çулĕпе ачаранах тĕрĕс сукмакпа утма сĕнчĕ.
Г. КОРЫТНИКОВА.