Урмарский муниципальный округ Чăваш Республикин Вăрмар муниципаллă округě
Ылтăн алăллă медицина ĕçченĕсем
Чир-чĕр çын миçе çултине пăхса çулăхмасть иккен. Кам шутланă-ха ватлăх çулĕсене çитсе пырсан та операци сĕтелĕ çине лекмелле пуласса; Нумай çул хушши хăй çинчен аптрамаллах аса илтермен пÿсĕр (грыжа) кĕтмен çĕртен «вăранчĕ». Çапла вара манăн районти тĕп больницăри хирурги уйрăмне лекмелле пулчĕ. Врачсемпе медсестрасем, санитаркăсем, пĕр сăмахпа каласан, шурă халатлă çынсем, талăкăн хăш вăхăчĕ пулнине пăхмасăр çын сывлăхĕшĕн тем тума та хатĕр пулнине чун-чĕререн туйса илтĕм. Операци тесен хуть те кама та шиклĕх туйăмĕ ярса илет. Мĕнле пулĕ; Мĕн пулĕ; Анчах та куç умне лекнĕ шурă халатлă çынсем çине пăхсанах туйса илтĕм: эпĕ шанчăклă алăра. Пырса кĕрсенех постри дежурствăри медсестрасем (С.Казаковăпа Т.Васина) тата санитаркăсем (Л.Филипповăпа В.Андреева) чупкалама пуçларĕç. Çак çĕр дежурствăра пулнă хирург В.Иванов та хыпăнса ÿкрĕ: çийĕнчех операци тумалла. Çур çĕр çитни те ниме те пĕлтермест, мĕн вăл ыйхă, мĕн вăл кану - ку пĕлтерĕшлех мар. Чи кирли, чи хакли вĕсемшĕн - çын сывлăхĕ. Г.Садовникова операци сестрипе В.Петров анестезиолог пулăшнипе Владимир Геннадьевич хирург мана çав çĕрех операци турĕ. Операци ăнăçлах иртрĕ пулин те çĕр каçа миçе хутчен пырса пăхмарĕç-ши мана дежурствăри врачпа медсестрасем, санитаркăсем. - Ну, мĕнле; Питех ыратмасть-и; Вĕсен кашни ăшă сăмахĕ сурана тÿрленме, ыратнине ирттерме пулăшать.
Операци вырăнне юлашки кунах тасатса çыхса тăракан медицина сестрисене те ăшă сăмахпа çеç аса илетĕп. Мĕнле çепĕççĕн те ăшшăн калаçаççĕ-ха вĕсем? Н.Павловăпа Н.Георгиевăна, В.Даниловăна сурана хăвăртрах тÿрлетессишĕн ырми-канми тăрăшнăшăн чĕререн тав сăмахĕ калатăп. Хирурги уйрăмĕнче ĕçлекен врачсемпе (Н.Кузьмина, В.Шибаевăна) ытти медицина сестрисене, санитаркăсене, пĕр сăмахпа каласан, çак уйрăмри пĕтĕм шурă халатлă çынсене мана вăхăтра пулăшу панăшăн, ура çине каллех çирĕп тăма пулăшнăшăн малашне те сирĕн ăшă кăмăллăх, çынна пулăшма яланах хатĕр пулни ан иксĕлтĕр тесе калас килет. Эсир пирĕнпе ăшшăн калаçни хăех пире хăвăртрах сывалма пулăшать.
С. АХВАНДЕРОВА.