Республика кубокĕшĕн
Июнь уйăхĕн малтанхи кунĕсенче Ара çырминчи çаранта Вăрмартан Мăнçырманалла каякан шоссе çулĕн сулахай енче маунтинбайк енĕпе тупăшса Чăваш Республикин кубокне çĕнсе илессишĕн иккĕмĕш тапхăрти ăмăртусем пулса иртнĕ. Ăмăртăва Шупашкарпа Çĕнĕ Шупашкар хулисен, Патăрьел тата пирĕн район спортсменĕсем - пурĕ 100 ытла яхăн çын хутшăннă.
Спорт çурчĕ умĕнче спортсменсем пĕр рете йĕркеленсе тăнă. Ăмăртăвăн тĕп судйи, ачасемпе çамрăксен Вăрмарти А.Ф.Федоров ячĕллĕ спорт шкулĕн директорĕ С.Архипов велосипедистсем ăмăртăва хатĕрри çинчен район пуçлăхĕн заместительне - райадминистрацин вĕрентÿ тата çамрăксен политикин пайĕн начальникне Ю.Соколова рапорт панă.
- Çамрăксем сывă пурнăç йĕркине çирĕп тытса пыни пире чăннипех те савăнтарать. Халĕ тупăшăва хутшăнакансем спортăн анлă çулĕ çине тухасса эпир шансах тăратпăр. Сире пурне те Вăрмар çĕрĕ çине килнĕ ятпа саламлатăп, ăмăртура çитĕнÿсем сунатăп, - тенĕ Юрий Васильевич.
Унтан ăмăртăва хутшăнакансене Чăваш Республикин велоспорт федерацийĕн Президенчĕ Э.Павлов, ЧР физкультурăпа спорт тата туризм министерствин тĕп специалисчĕ С.Овсянников, Шупашкарти В.Ярды ячĕллĕ спорт шкулĕн директорĕ Б.Фомин саламланă.
Çак кунсенче ачасемпе çамрăксен А.Ф.Федоров ячĕллĕ спорт шкулĕн тĕп бухгалтерĕ Е.Николаева 50 çул тултарчĕ. Юбилей ячĕпе ăна савăнăçлă лару-тăрура ЧР велоспорт федерацийĕн Президенчĕ Э.Павлов Тав çырăвĕ панă.
Юбиляра çавăн пекех нумай çул тÿрĕ кăмăлпа ĕçленĕшĕн ЧР физкультурăпа спорт тата туризм министерствин, район администрацийĕн Хисеп грамотисемпе наградăланă.
С.Архипов тĕп судья ăмăрту йĕркипе паллаштарать. Велосипедистсен анаталла-тăвалла чупмалла, трасса çăмăл мар.
Часах ăмăртусем пуçланаççĕ. Старта чи малтанах 1996-1997 çулсенче çуралнă ачасем тухаççĕ.
Çакна палăртма кăмăллă: ку ушкăнра малти призлă вырăнсене пурне те пирĕн район спортсменĕсем: В.Михайлов (Вăрмар поселокĕ), А.Таратин (Кавал), Д.Яковлев (Кивĕ Вĕренер) çĕнсе илнĕ.
1994-1995 çулсенче çуралнисем хушшинче çĕнтерÿçĕ ятне А.Архипов (Мăнçырма) тивĕçет.
1992-1993 çулхи аслă ушкăнри çамрăксенчен Г.Романов (Мăнçырма) виççĕмĕш пулать.
Хĕр ачасем хушшинче те хĕрÿ кĕрешÿ пынă. 1992-1993 çулсенчи аслă ушкăнри хĕр ачасенчен Вăрмар поселокĕнче çуралса ÿснĕ, халĕ Шупашкарта Олимп резервĕсен училищинче вĕренекен М.Семенова пĕрремĕш вырăна тухнă.
1990-1991 çулсенче çуралнă юниоркăсенчен Кивĕ Шулханта çуралса ÿснĕ, халĕ Шупашкарта Олимп резервĕсен училищинче вĕренекен спорт мастерĕн кандидачĕ Е.Павлова виççĕмĕш вырăн йышăннă. Çĕнтерÿçĕсене дипломпа наградăланă, хаклă парнесем панă. Кăçалхи июнĕн 10-мĕшĕнче пирĕн пултаруллă спортсменсем Патăрьел районĕнче ирттерекен виççĕмĕш тапхăрти ăмăртусене хутшăнчĕç.
А.Хованский.