Конкурса хутшăннă
Кăçалхи июнĕн 10-11-мĕшĕсенче Елчĕк районĕнчи акционерсен «Прогресс» хупă обществинче ĕнесене машинăпа сăвакансен тата выльăхсене искусственнăй майпа пĕтĕлентерекенсен республикăри йăлана кĕнĕ конкурсĕ иртнĕ. Кăçал ăна Республика кунне халалланă. Икĕ кун хушшинче вĕсем ĕне сăвас, выльăхсене искусствăлла майпа пĕтĕлентерес енĕпе вырăнта пухнă опыта кăтартнă.
Конкурсăн тĕп тĕллевĕ - выльăх-чĕрлĕх ĕрчетес ĕçре малта пыракан опыта пропагандăласси, ăна анлăн сарма, пахалăха лайăхлатма, ферма çыннисен пĕлĕвне ÿстерме, фермăсенче çĕнĕ оборудованипе усă курма пулăшасси пулнă.
Пирĕн районтан республикăри конкурса «Арабоси» агрофирмăри В.Михайлова дояркăпа Е.Семенова оператор хутшăннă.
Венера ялти шкултан вĕренсе тухнăранпах дояркăра вăй хурать, пурĕ 15 çул. Пултаруллă доярка хăйĕн ĕçри пултарулăхне ÿстерсех пырать. 2005 çулта вăл хăйне çирĕплетсе панă ĕнесенчен çулталăкра 3157-шер килограмм сĕт суса илнĕ пулсан, кăçалхи 5 уйăхра 4500-шер килограмм сунă.
Çивĕч кĕрешÿре пирĕн ентешсем хăйсен мĕн пур ăсталăхне панă, лайăх результат кăтартнă.
О. Васильев.