Урмарский муниципальный округ Чăваш Республикин Вăрмар муниципаллă округě
Паккус хыççăн паккус выртать
Хĕрÿ ĕççи вĕçленнĕ, анчах та хресченĕн пĕр канăç та çук. Халĕ утă вăхăчĕ. Выльăх-чĕрлĕх тĕрĕс-тĕкел хĕл каçтăр тесен ытлă-çитлĕ утă хатĕрлемелле. Ку вара Шăхальсемшĕн çĕнĕлĕх мар. Вĕсем тĕш тырă, нумай çул ÿсекен культурăсен вăрлăхне туса илессипе ĕçлеççĕ. Хăйсем те утă-улăмне çителĕклех туса илеççĕ. Халичченхи вăхăтра рапс, кукурус çитĕнтернĕ, халĕ вара люцерна, козлятник акса лартса туса илеççĕ. Ку хуçалăхра çум курăк кашласа ларакан участоксем çук. Аякран пăхсанах нумай çул ÿсекен козлятник анисем куçа илĕртеççĕ. Нумай çул ÿсекен курăксене туса илни тăкаксене те чылай чакарать, уй-хирсенче çум курăк кашлассине те сахаллатнине лайăх ăнланаççĕ Шăхальсем. Хуçалăх валли те, ял халăхĕ валли те выльăх апачĕ пулать. Юнашар республикăри çынсем те выльăх апачлĕх утă туянасшăн. Ку хуçалăхра козлятник 220 гектар йышăнать. Хуçалăх ертÿçисем каланă тăрăх унăн пахалăхĕ пысăк, утти çемçе, выльăх юратса çиет. Хальхи вăхăтра ку хуçалăхра козлятник ани çинче ĕç вĕресе кăна тăрать. Утă çулмалли комбайнпа М.Тапиновпа А.Ульянов механизаторсем тата МТЗ-82 трактор çумне роторлă косилка кăкарса В.Петров утă çулаççĕ. Паккус хыççăн паккус выртса юлать. Уттине вара утă çавăрса типĕтмелли ятарлă агрегатпа (ворошилкăпа) енчен енне çавăрттарса типĕтеççĕ. Типĕ утăна рулонсем туса çумăр лекмелле мар вырăна тирпейлесе хураççĕ.
А. Николаева.