Савăнчĕ уявра халăх
Çимĕк хыççăн кашни çулах Энĕшпуçсем ял уявне ирттереççĕ. Акă кăçал та çак ырă йăлана тăсас терĕç. Ял халăхĕ те чăтăмсăррăн кĕтет ăна, ара çĕр-шывăн тĕрлĕ кĕтесĕсенче пурăнакан Çимĕке килнĕ тус-юлташсемпе тĕл пулса хутшăнма, ялта нумайранпа пулман ентешсемпе курса калаçма, юрă-ташăпа киленме, ял-йышăн çитĕнĕвĕсемпе савăнма, тĕрлĕ хыпар-хăнар пĕлме пулать-çке уявра.
Ирхине ирех Энĕшпуç çийĕн янăракан савăнăçлă юрă-кĕвĕ халăха ял уявне йыхравларĕ. Çанталăкĕ те ял-йыш кăмăлне тивĕçтерсе тÿлек те хĕвеллĕ тăчĕ. Кăнтăрла çитеспе çынсем ушкăнăн-ушкăнăн ял варринчи кану паркне пуçтарăнчĕç. Тĕрлĕ çĕртен килсе çитнĕ лавккаçсем суту-илÿ вырăнĕсене паркра ретĕн-ретĕн вырнаçтарса лартнă, халăха тĕрлĕ тавар сĕнеççĕ, тутлă шашлăкпа илĕртеççĕ.
Ял уявне саламлă сăмахпа ял тăрăхĕн пуçлăхĕ О.Иванов уçрĕ, ял уявне пуçласси çинчен пĕлтерчĕ. Район пуçлăхĕ В.Кириллов ячĕпе райадминистрацин культурăпа социаллă аталану тата архив ĕçĕн пайĕн пуçлăхĕ Г.Петрова саламларĕ. Уява Энĕшпуçĕнче çуралса ÿснĕ, çĕр-шывăн тĕрлĕ кĕтесĕсенче пурăнакан ятлă-сумлă çынсем чылай килсе çитнĕ. Вĕсенчен пĕри, Мускавра пурăнакан В.Дмитриев полковник. «Савăнатăп тăван ялпа, чăнахах пултаруллă çынсем пурăнаççĕ çуралнă кĕтесре, шав малалла талпăнаççĕ. Тăван яла килмессерен кашнинчех ырă улшăнусем куратăп. Мĕнле хавхалантармăн-ха ĕçлекен çынсене», - терĕ вăл сăмахне ĕçпе çирĕплетсе. Валерий Алексеевич Мускаври офицерсен «Сыны Отечества» пĕрлешĕвĕ ертÿçи В.Ильин вице-адмиралăн хушăвне пурнăçласа Энĕшпуç ял тăрăхĕн пуçлăхне О.Иванова тата унăн заместительне В.Муллинана «А.Г.Николаев СССР летчик-космонавт» ячĕллĕ медальпе, «Службăра палăрнăшăн» кăкăр çине çакмалли паллăпа А.Николаева наградăларĕ.
Уява килнĕ халăх кăмăлне çĕклеме шурă Шупашкартан чăваш эстрада çăлтăрĕсем çитрĕç, юрă-ташăпа савăнтарчĕç.
Концерт хыççăн спорт вăййисем пуçланчĕç. Спорт программи те пуян пулчĕ - волейбол, футбол, ал вăйĕ виçесси... Уйрăмах пуçтарăннă халăха наци кĕрешĕвĕ килĕшрĕ. Çак вăййа малтан ача-пăча уçрĕ, вĕсене те хавхалантарса парнесĕр хăвармарĕç.Унтан вара тĕрлĕ ялтан пуçтарăннă паттăрсем хăйсен вăйне виçрĕç. Çивĕч кĕрешÿре Энĕшпуçсем маххă памарĕç. Пурне те парăнтарса паттăра «Шоркистринский» кооператив пуçлăхĕн çумĕ Д.Иванов тухрĕ.
Чылайччен савăнчĕ халăх. Тулли кăмăлпа каç сĕмĕпе тин уявран саланчĕ. Чăннипе те ĕçлеме те, савăнма пĕлет ял халăхĕ.
П. АЛЕКСЕЕВ.