Раççей тава тивĕçлĕ тренерне А.Федорова асăнса
Шоссе çинче велосипедпа чупса Чăваш Республикин кубокне çĕнсе илессишĕн иккĕмĕш тапхăрти ăмăртăвĕсене тата районта мала тухассишĕн СССР спорт мастерне, Раççей тава тивĕçлĕ тренерне А.Федорова асăнса йăлана кĕнĕ йĕркепе Вăрмарта ирттернĕ улттăмĕш уçă чемпионата Шупашкар, Çĕнĕ Шупашкар хулисемпе Муркаш, Патăрьел, Шăмăршă тата пирĕн район спортсменĕсем пурĕ 100 ытла хутшăннă. Ăна Республика кунне халалланă.
Акă велосипедистсем районти Спорт çурчĕ умне пĕр рете йĕркеленсе тăнă. Ăмăртусем пуçланнă ятпа спортсменсене район пуçлăхĕн социаллă ыйтусемпе ĕçлекен заместителĕ - вĕрентÿ тата çамрăксен политикин пайĕн начальникĕ Ю.Соколов саламланă.
- Вăрмар çĕрĕ пултаруллă велосипедистсене кĕтсе илме яланах хатĕр. Спортăн ку енĕпе чапа тухнă велосипедистсем районта сахал мар. Вĕсен ырă тĕслĕхĕ ÿсекен çамрăк ăрăва çĕнĕ çитĕнÿсем тума хавхалантарать. Сире пурне те паянхи ăмăртусенче ăнăçусем сунатăп, - тенĕ Юрий Васильевич. Çавăн пекех пултаруллă спортсмена, СССР спорт мастерне, Раççей Федерацийĕн тава тивĕçлĕ тренерне А.Федорова ырă сăмахсемпе асăнса тата велосипедистсене çĕнĕ çитĕнÿсем сунса СССР спорт мастерĕ, тĕнче чемпионатне хутшăннă, Алексей Федоровичăн воспитанникĕ Н.Федоров, СССР спорт мастерĕ, Чăваш Республикин физкультурăпа спортăн тава тивĕçлĕ ĕçченĕ, райадминистраци ĕçĕсен управляющийĕ-организациллĕ ĕçсен пайĕн начальникĕ Н.Павлов, малтанхи çулсенче физкультурăпа спорт комитетне ертсе пынă М.Семенов, ЧР велоспорт Федерацийĕн председателĕ Э.Павлов, В.Ярды ячĕллĕ республикăри ачасемпе çамрăксен спорт шкулĕн директорĕ Б.Ефимов, Алексей Федоровичăн мăшăрĕ Галина Ивановна тата ыттисем саламланă, ăнăçусем суннă. Кунтах А.Федоровăн ывăлĕ, Раççей спорт мастерĕ, тĕнче чемпионатне хутшăннă Андрей та хутшăннă.
Велосипедпа чупмалли трасса - Кивĕ Вăрмарпа Кивĕ Вĕренер ялĕсен хушшинчи асфальт сарнă шоссе çулĕ.
Чи малтанах старта 1996-1997 çулсенче çуралнă арçын ачасем тухнă. Вĕсем 10 километрлă дистанцире тупăшнă. Пирĕн велосипедистсем чи пултаруллă пулнине çирĕплетсе панă. Д.Яковлев (Кивĕ Вĕренер) - пĕрремĕш, А.Таратин (Кавал) иккĕмĕш вырăнсене йышăннă.
1994-1995 çулсенчи çамрăксем хушшинче те çĕнтерÿ пирĕннисен енче пулнă. Р.Боредский (Пинер) - пĕрремĕш, А.Архипов (Мăнçырма) иккĕмĕш вырăнсене тухнă.
1990-1991 çулхи юниорсем 25 километрлă дистанцире чупса ăмăртнă, И.Тимофеев (Вăрмар поселокĕ) виççĕмĕш пулнă.
1989 çулта çуралнă тата унтан та аслăрах çулхи арçынсем те çав дистанцирех тупăшнă. Раççей спорт мастерĕ, Шупашкарта Олимп резервĕсен шкулĕнче вĕренекен Е.Крылов (Вăрмар поселокĕ) 39 минут та 02 çеккунтра чупса тухнă, пĕрремĕш вырăн йышăннă. Спорт мастерĕн кандидачĕ А.Саминов (Çĕнĕ Шулхан) çĕнтерÿçĕне 26 çеккунт выляса ярса иккĕмĕш вырăна тухнă. Вăл та Шупашкарта Олимп резервĕсен училищинче вĕренет.
1989 çулта çуралнă тата унтан та аслăрах хĕрарăмсем хушшинче Шупашкарта Олимп резервĕсен училищинче вĕренекен А.Семенова (Вăрмар поселокĕ) дистанцине иккĕмĕш вĕçленĕ.
Ăмăрту çĕнтерÿçисене дипломсемпе наградăланă, хаклă парне парса чыс тунă.
- Спонсăр пулăшмасăр ăмăртăва кирлĕ шайра ирттерме май çук. Ку енĕпе пире ку хутĕнче те «Вăрмар пасарĕ», «Вăрмарти çăкăр завочĕ», «УК ЖКХ» тулли мар яваплă обществăсем (пуçлăхĕсем Г.Николаев, А.Васильев, В.Иванов), Вăрмарти тырă йышăнакан пункт (директорĕ В.Александров), В.Волков предприниматель, А.Федоров воспитанникĕсем, СССР спорт мастерĕсем Н.Федоров, С.Иванов (Чулкас) тата В.Иванов (Тикаш) пулăшрĕç, вĕсене ăнăçусем, пирĕнпе тытакан çыхăнăва çирĕплетсе пыма ырă сунатпăр, - каласа парать ачасемпе çамрăксен А.Ф.Федоров ячĕллĕ Вăрмарти спорт шкулĕн директорĕ Сергей Витальевич Архипов.
А. Хованский.