Урмарский муниципальный округ Чăваш Республикин Вăрмар муниципаллă округě
Тавара хапăлласах туянаççĕ
Шанчăклă, яваплă ĕçченсем - коллектив тĕрекĕ. Çапла çирĕплетет райпо совечĕн председателĕ К.Никитин. Кунта сăмах чылай çултанпа райпо системинче сутуçăра ĕçлекенсем пирки пырать.
Акă «Лидер» лавккари Алевтина Павловна Кирилловапа Лидия Павловна Кузьмина 29 çул райпора сутуçăсем пулса тăрăшса вăй хураççĕ. Хăйсем ĕçне чунтан парăнса ĕçлеççĕ. «Лидер» лавккара вĕсем мĕн уçăлнăранпа халăха пахалăхлă таварпа тивĕçтереççĕ. Çакна палăртмалла: иккĕшĕ те пĕр ялсем, пĕр урамра выляса ÿснĕскерсем, мĕн ачаран сутуçăсем пулма ĕмĕтленнĕ. Çавăнпа та ялти вăтам шкула вĕренсе пĕтерсен, тÿрех Шупашкарти коопераци училищине çул тытаççĕ. Унтан вĕренсе тухса алла диплом илсен тăван тăрăха килеççĕ. 1979 çултанпа райпора сутуçăсем пулса ĕçлеççĕ.
«Чунтан парăнса пурнăçлатăп çак ĕçе. Пирĕн лавккана кĕрсен туянакана пушă алăпа кăларса ямастпăр, мĕн кирлине çийĕнчех тупса пама тăрăшатпăр», - тет А.Кириллова.
Кирек кама илер, пĕр-пĕр заведение çитсе курса унта ăна лайăх йышăннине, унпа питĕ тимлĕ пулнине туйса илсен, вăл унта татах туртăнать, ăнтăлать. Çак лавкка сутуçисем пирки те лайăххине кăна палăртмалла. Вĕсем туянаканпа яланах тараватлă, ăш- пиллĕ.
Пурĕ 500-е яхăн тĕрлĕ тавар сĕнеççĕ вĕсем килен-каяна. Сĕтел-пукан, хуçалăхра кирлĕ таварсем, кĕпе çумалли машинăсем, холодильниксем, вырăн таврашĕсем тата ытти тĕрлĕ япаласем куçа илĕртеççĕ, туянма ыйтаççĕ тейĕн. Заказсем те йышăнаççĕ вĕсем. Калăпăр, сĕтел-пукан туянас пулсан тĕсĕ, виçи туянакана мĕнлерех кирлĕ çавăн пек хатĕрлесе параççĕ. Сĕтел-пукан тенĕрен, вĕсене Чулхулари, Мари Эл Республикинчи фабрикăсенчен кÿрсе килеççĕ. Тавара кредит мелĕпе те туянма пулать. Унăн вăхăчĕ ултă уйăх таранах. Ăна вара киле çитиех тивĕçтереççĕ. Акă эпĕ килнĕ кун та А.Кириллова сутуçăпа Л.Кузьмина заведующин пĕр пушă вăхăт та пулмарĕ, кунта килнĕ клиент валли сĕтел-пукана машина çине тиерĕç.
З. Елакова.