Халăх кăмăллă пулчĕ
Июлĕн 9-мĕшĕнче Мăнçырмасем Акатуйĕнче савăнчĕç. Ирхине Мăнçырмари Тихвински Турă Амăшĕн чиркĕвĕнче кĕлĕ иртнĕ. Ун хыççăн халăх тата сумлă хăнасем çырмана сиплĕ çăл патне аннă. Вĕсем витресем, тĕрлĕрен савăт-сапасем илсе пынă. Мăнçырма чиркĕвĕн настоятелĕ Леонид атте çăл патĕнче кĕлĕ ирттернĕ, шыва светит тунă. Тĕрлĕ ялсенчен пухăннă халăх çак сиплĕ шыва савăтсене тултарнă. Леонид атте Турă ячĕпе ырлăхлă-сывлăхлă пулма пехил панă.
Чиркÿ уявĕ, Алексей Трофимов велосипедиста асăнса маунтинбайк енĕпе Раççей Кубокне çĕнсе илессишĕн вунпĕрмĕш тапхăрти ăмăртăвĕпе пĕр кун килнĕ май, стадиона халăх йышлăн пухăннă.
Савăнăçлă уява Мăнçырма ял тăрăхĕн пуçлăхĕ В.Семенов уçрĕ. Ял халăхне, хăнасене уяв ячĕпе саламласа ырлăх-сывлăх, ăнăçу сунчĕ. Унтан ял тăрăхĕн тĕп эксперт-специалистсене Ю.Казакована сăмах пачĕ. Юлия Денисовна ял тăрăхĕн администрацийĕн ĕçĕ-хĕлĕпе тĕплĕн паллаштарчĕ, умри тĕллевсем çинче чарăнса тăчĕ.
Мăнçырмара çуралса ÿснĕ, çак ялтах тĕпленсе пурăнакан Анна Алексеевнапа Михаил Александрович Александровсем çемье çавăрнăранпа 50 çул çитрĕ. Çак ятпа юбилярсене район пуçлăхĕн социаллă ыйтусемпе ĕçлекен заместителĕ - райадминистрацин вĕрентÿ тата çамрăксен политикин пайĕн начальникĕ Ю.Соколов, ЗАГС пайĕн пуçлăхĕ В.Волкова ăшшăн саламларĕç, вĕсене райадминистраци пуçлăхĕн Тав çăрăвне тата хаклă парне пачĕç.
Александровсене çавăн пекех Мăнçырма ял тăрăхĕн пуçлăхĕ В.Семенов саламласа парне парса чыс турĕ.
Вăрмарсен Шупашкарти ентешлĕхĕн вице-президенчĕ пулнă Д.Егоров ветерансене саламласа ырлăх-сывлăх сунчĕ, хăйĕн кĕнекине парнелерĕ.
Мăнçырмара çуралса ÿснĕ, хăй вăхăтĕнче район Совечĕн ĕçтăвкомĕн председателĕнче, парти райкомĕн пĕрремĕш секретарĕнче вăй хунă, Аслă Отечественнăй вăрçă ветеранĕ М.Петров уява пухăннă ял-йышпа хăнасене Акатуй ячĕпе саламласа ăнăçу сунчĕ.
Мăнçырмари «Павлов Вячеслав Федорович» хресчен (фермер) хуçалăхĕн пуçлăхĕ В.Павлов çур аки вăхăтĕнче палăрнă ĕçченсене парнесем парса чыс турĕ.
«Ресурсы» агрофирмăн пуçлăхĕ С.Дмитриев Мăнçырмари хăмла плантацийĕнче тăрăшса ĕçлекенсене тав сăмахĕсем каларĕ, хаклă парнесем пачĕ.
Унтан ялти вăтам шкул директорĕ, «Единая Россия» партин вырăнти уйрăмĕн пуçлăхĕ В.Николаев ялăн социаллă-экономикăлла аталанăвне активлă хутшăнакансене Тав çырăвĕсем парса хавхалантарчĕ.
Вăрмарсен Шупашкарти ентешлĕхĕн вице-президенчĕ В.Нягин ÿсекен çамрăк ăрăва çарпа патриотла воспитани парас енĕпе тăрăшулăх кăтартакансене Тав çырăвĕсем пачĕ.
Мăнçырма ял тăрăхĕн пуçлăхĕ В.Семенов ялта çуралса ÿссе çĕр-шывăн тĕрлĕ кĕтесĕсенче пурăнакан ятлă-сумлă çынсем пирки ырă сăмахсем каларĕ. Ялта та пултаруллă çынсем сахалах мар, вĕсем пирки те ăшă сăмахсем пулчĕ. Яла тирпей-илем кĕртме активлă хутшăнакансене, ял пурнăçĕшĕн тăрăшакансене грамотăсемпе наградăларĕ, парнесем пачĕ.
Акатуйра Шупашкартан килнĕ артистсем тата ялти культура çурчĕ çумĕнчи художествăлла пултарулăх коллективĕн членĕсем хăйсен юррипе уява килнĕ халăха тыткăнларĕç.
Уяв спорт ăмăртăвĕсемсĕр мĕнле пултăр-ха вăл. Тупăшусем тĕрлĕ енлĕ пулчĕç. Волейболла выляса мала тухассишĕн тăватă команда тупăшрĕç. Çакна аса илтеретпĕр: маларахри çулсенче Мăнçырмасем волейболла выляс енĕпе районта кăна мар, республикăра та малтисен шутĕнче пулнă. Çак пысăк хисепе паян çирĕплетсе пама пултараççĕ-и вĕсем. Чылайăшĕ çак шухăшлă пулчĕç. Çивĕч кĕрешÿре пĕрремĕш вырăна Çĕнĕ Шупашкартан килнĕ «Спартак» команда çĕнсе илчĕç. Мăнçырмасен вара иккĕмĕш вырăнпа килĕшмелле пулчĕ. Виççĕмĕш вырăнта Тăвай районĕнчи Тушкилти волейболистсем.
32 килограмлă кире пуканне 45 хут çĕклесе чемпион ятне А.Каланов (Кивĕ Вĕренер) çĕнсе илчĕ. Иккĕмĕшпе виççĕмĕш вырăнсене А.Беловпа Н.Дмитриев (Мăнçырма) йышăнчĕç.
Шашкăлла выляса хăйсен пултарулăхне тĕрĕслесе пăхас текенсем те чылайăн пулчĕç. Чи ăста выляканни вара СССР спорт мастерĕ Н.Дмитриев (Кавал) пулнине тепĕр хут çирĕплетсе пачĕ. Спорт мастерĕн кандидачĕсем - О.Вакинпа В.Иванов (Вăрмар поселокĕ) иккĕмĕшпе виççĕмĕш вырăнсене тухрĕç.
Пултаруллă шашистсем кăшт маларах Çĕрпÿ ярмăрккинче те малти призлă вырăнсене çĕнсе илнĕччĕ. Паян вара вĕсем лайăх выляма пĕлнине тепĕр хут çирĕплетсе пачĕç.
Уява илем кÿрекенĕ вăл карусель шутланать. Районта тупма май çуккине пула Мăнçырмасем ăна кÿршĕллĕ Тăвай районĕнчи Тушкил ялĕнчен илсе килнĕ. Ача-пăча вара ун çинчен анма та пĕлмерĕ, кăмăлĕ туличченех ярăнчĕ, савăнчĕ.
Кĕрешсе паттăра кам юлĕ, такана хăшĕ çĕнсе илĕ; Пурне те кăсăклантарчĕ çакă. Хĕрÿ тупăшура вара паттăра С.Павлов (Мăнçырма) тухрĕ.
Ытти тĕрлĕ спорт вăййисем те интереслĕ иртрĕç.
Футболла выляса мала тухассишĕн районти чемпионата хутшăнса Мăнçырма тата Вăрмар поселокĕнчи футбол командисем тĕл пулса вылярĕç. «Килте стена та пулăшать» тенĕ пек çĕнтерÿ Мăнçырмасен енче пулчĕ, 2 : 0 шутпа выляса илчĕç.
Пĕтĕмĕшле каласан, уяв савăнăçлă иртрĕ, халăх кăмăллă пулчĕ.
Паллă ĕнтĕ, уява çÿллĕ шайра ирттересси спонсорсен пулăшăвĕнчен нумай килет. Ку хутĕнче те Акатуя йĕркелесе ирттерме Мускаври «Паркет çурчĕ» холдинг президенчĕ Ю.Афанасьев, кунти строительство компанийĕн генеральнăй директорĕ В.Иванов, унăн заместителĕ Ю.Федоров, А.Михайлов предприниматель, Çĕнĕ Уренгойри магазинсен сечĕн директорĕ В.Пидюков тата ыттисем укçа-тенкĕ чылай уйăрнă.