Тÿрĕ чунпа ĕçлеççĕ, канма та пĕлеççĕ
Кашни çулах июль уйăхĕн пĕрремĕш шăматкунĕн че Пĕтĕм тĕнчери потребкоопераци кунне паллă тăваççĕ. Чаплă уява кăçал районта каярах паллă турĕç, анчах унăн ячĕ-сумĕ пĕрре те чакмарĕ, пачах урăхла - питĕ çÿллĕ шайра иртрĕ. Палăртнă 11 сехет тĕлне район центрĕнчи «Универмаг» лапамĕ умне вуншар-вуншар çын пуçтарăнчĕ. Чаплă уявпа пухăннисене чи малтанах райпо канашĕн председателĕ К.Никитин, унтан район пуçлăхĕ В.Кириллов саламларĕç. Вячеслав Николаевич хăйĕн сăмахĕнче потребкоопераци системи, унта ĕçлекенсем яла аталантармалли чи пысăк структурăсенчен пĕри пулнине палăртрĕ, çак сферăра ĕçлекенсене тав сăмахĕ каларĕ.
Константин Владимирович коллективăн кăçалхи ĕç-хĕлĕпе паллаштарнă хыççăн, ĕçре малта пыракансене Хисеп хучĕсем, хаклă парнесем парса чысларĕ. Чăвашпотребсоюз предприятийĕсем туса кăларакан апат-çимĕçе, ĕçмелли-çимеллине дегустацилесси те кунтах иртрĕ.
Уява Шупашкартан килнĕ артистсен концерчĕ вĕçлерĕ. |