Ял администрацийĕ тăрăшнипе
Юлашки вăхăтра республикăра, çав шутра пирĕн районта та çулсене йĕркеллĕ пăхса тăрасси çине пысăк тимлĕх уйăрма пуçларĕç. Иртнĕ çул Мăнçырма ялĕ витĕр тухса каякан юхăнса кайнă çула тÿрлетме «Слава» фермер (хресчен) хуçалăх пуçлăхĕ В.Павлов тата ытти спонсорсем тăрăшнипе Кавал çырминчен чул турттарни çинчен çырнăччĕ.
Нумаях пулмасть ял администрацийĕн пуçарăвĕпе асăннă çул çине 560 тонна грави турттарчĕç. Икĕ кĕпер хушшинчи çул уйрăмах ванса пĕтнĕччĕ, çав тĕле 12 КамАЗ автомашинăпа грави тăкрĕç, ăна якатрĕç. Кунта ĕнтĕ ял тăрăхĕн пуçлăхне В.Семенова лайăх енчен палăртас килет, унăн тăрăшулăхĕнчен килчĕ çакă. Çула йĕркене кĕртнĕшĕн хаçат-журнал турттаракан районти почтамт тата ытти водительсем кăмăллă. Халĕ ялти икĕ касра пурăнакансем пĕр-пĕринпе тачă çыхăну тытма пултараççĕ. Çывăх вăхăтрах ял тăрăхĕн пуçлăхĕ ытти çулсене те чул сарса тирпейлесшĕн. Тирпей-илем кĕртес тĕлĕшпе ăнăçлă ĕçлеççĕ. Ялти культура çурчĕ умне тимĕр карта тытрĕç. Чиркÿ кассинчи çăл патĕнчи кĕпе-тум-тир çумалли валашки ванса çурăлса пĕтнĕччĕ. Çурăкĕсене тимĕр листисемпе çапса питĕркелесе хунăччĕ. Анчах та кунпа хĕрарăмсем кăмăлсăр пулчĕç. Çавна шута илсе çав валашка вырăнне асбестпа цементран тунă труба хучĕç. Ял тăрăхĕн депутачĕ Ю.Матвеев йĕркелесе ертсе пычĕ. О.Семенов, Л.Иванов, П.Гурьев, Ю.Павлов, В.Александров тăрăшса вăй хучĕç. Ку ĕçе леш касри Энкĕпуçĕнчи çăл патĕнче те вĕçленĕ. Куншăн, паллах, ял хĕрарăмĕсем савăнаççĕ.
Хальхи вăхăтра ял администрацийĕ культура çурчĕ патĕнчи котельнăйĕнче юсав ĕçĕсене хăвăртрах вĕçлессишĕн тăрăшать. Кăçал ку ĕçе вĕçне çитереймесен те çитес çул культура керменĕнче ăшă пуласса шантарать.
Г. Петров.
"Урмарская районная газета"