Пирĕн районтан – тепĕр олимпиец
Тĕнчери спорта юратакан мĕн пур çынсем халĕ Пекинри XXIX Олимпиада вăййисемпе интересленеççĕ, ăмăртусем мĕнле иртнине сăнасах тăраççĕ. Пирĕн районта пурăнакансене вара Сергей Иванов велосипедистăн шăпи те интереслентерет.
Унăн ашшĕ - Валерий Иванов Кĕтеснер ялĕнче çуралса ÿснĕ. Хăйĕн спортри ăсталăхне Вăрмарти ачасемпе çамрăксен спорт шкулĕнче ÿстернĕ. 1971 çулта Ставрополь крайĕнчи Георгиевск хулинче Пĕтĕм Раççейри ăмăртусем пулса иртнĕ. В.Иванов 25 çухрăмлă дистанцире 20 спорт мастерне кая тăратса хăварать. Виççĕмĕш вырăн йышăнса кĕмĕл медаль çĕнсе илет, СССР спорт мастерĕн нормине пурнăçлать. Спорт шкулне çÿрекенсенчен чи малтан СССР спорт мастерĕ пулса тăрать.
Сергей ятлă ывăлĕ 1975 çулта çуралнă. Вăл та ашшĕ çулĕпех кайнă. Кĕтеснерти вăтам шкул хыççăн Шупашкарти Олимп резервĕсен шкулĕнче вĕреннĕ, спортри ăсталăхне малалла туптанă. Самарăра ирттернĕ ăмăртусенче ырă тĕслĕх кăтартнă. Валерий Расколовпа пĕрле «Лада» - Самара - ЦСК командăра ăмăртнă. Спорт мастерĕ С.Иванов профессионал Италири «TVM» командăра та пулнă. Итали командин составĕнче пулса ют çĕр-шывсенче ирттернĕ ăмăртусенче хăйĕн пултарулăхĕпе палăрса тăнă. Халĕ вăл Бельгире пурăнать. Пекинра иртекен Олимпиадăра Раççей чысне Самара облаçĕн командин составĕнче хÿтĕлет.
А. ХОВАНСКИЙ.