Учитель - ачасен иккĕмĕш амăшĕ. Шкултан вĕренсе тухсан кашни çын умĕнче тĕрлĕ çул сарăлса выртать. Акă, сăмахран, пирĕн класс ертÿçи Татьяна Алексеевна Иванова. 1960 çулта Красноармейски ялĕнче çуралнă. 1976 çулта вăтам шкултан вĕренсе тухнă. Алла атестат илсен малтан пурнăç çулĕ ăна тĕп хулари электроаппаратура заводне илсе çитернĕ. Пĕлÿшĕн çунакан çамрăк хĕр заводра ĕçленипех килĕшсе ларма пултарайман. Унта 4 çул ĕçленĕ хыççăн Татьяна Алексеевна И.Н.Ульянов ячĕллĕ Чăваш патшалăх университечĕн историпе филологи факультетне вĕренме кĕрет. Диплом илнĕ çамрăк педагога 1985 çулта Тикаш шкулне ĕçлеме яраççĕ. Çавăнтанпа паяхни кунчченех вăл пирĕн шкулта вырăс чĕлхипе литературине вĕрентет. 5-мĕш класран пуçласа Татьяна Алексеевна пирĕн класс ертÿçи. Вăл пирĕнпе ĕçленĕшĕн эпир чунтан савăнатпăр. Урок ирттернисĕр пуçне вăл пирĕнпе тĕрлĕ мероприятисем ирттерме вăхăтне те, вăй-халне те шеллемест. Шкулта çеç мар, Шупашкара та час-часах илсе каять вăл пире. Тĕрлĕ музейсенче нумай хутчен пулнă эпир, чăваш спектаклĕсене пăхса савăннă. Ачасемпе Татьяна Алексеевна яланах кăмăллă, вĕсене вăл чунтан юратать.

Тикаш шкулĕ.