Ку вăл Шăхальти фельдшерпа акушер пунктĕнче вăй хуракан Алина Анатольевна Николаева. Вăл çамрăкпа çамрăк пек, аслăрах ăрури çынсемпе пурнăçра нумай хура-шур курнă çын пек калаçма пĕлет. Хăйĕн ăста аллисемпе кăна мар, çепĕç чĕлхипе те пире, ватă çынсене, сыватма тăрăшать. Ахальтен каламаççĕ çав:«Сăмахпа çынна сыватма та, «çапса» ÿкерме те пулать», – тесе. Аслă ăрури çынсенчен нумайăшĕ сире, Алина Анатольевна, ырă кăмăлушăн, çепĕç чĕлхешĕн, ăста аллусемшĕн хисеплет, юратать. Миçе çынна кирлĕ вăхăтра пулăшу паман-ши эсир! Шутласа кăларма та çук пулĕ. Хĕвел ансан та, вăл тухса ĕлкĕреймен чухне те чăрмантараççĕ Алина Анатольевнана. «Вăхăт çук», - тесе тăмасть вăл, яланах çынсене пулăшма хатĕр, хăйĕн тивĕçне çÿллĕ шайра пурнăçласа пырать. Малашне те çапла пултăр.