Августăн 4-мĕшĕнче, Вăрмар районĕнче ĕçлĕ визитпа Чăваш Республикин ĕçлев тата социаллă хÿтлĕх министрĕ Алена Геннадьевна Елизарова пулчĕ.

Вăл райадминистрацин ларусен залĕнче Вăрмар райо­нĕн­чи халăхăн социаллă ыйтă­вĕсене тивĕçтерекен комп­лекслă центрăн, районти халăха социаллă пулăшу кÿрекен уйрăмăн, районти халăха ĕçпе тивĕçтерекен уйрăмăн ĕçченĕсемпе тĕлпулу ирттерчĕ. Тĕл­пулăва Вăрмар район пуçлăхĕ М.Пуклаков тата Вăрмар район администрацийĕн пуçлăхĕн тивĕçĕсене пурнăçлакан Н.Павлов хутшăнчĕç.

Чи малтан Вăрмар ра­йон администрацийĕн пуçлă­хĕн тивĕçĕсене пурнăçлакан Н.Павлов сăмах илчĕ. Вăл ра­йонти лару-тăру çинче чарăнса тăчĕ, иртнĕ кунсенче ра­йонта ЧР Пуçлăхĕн тивĕçĕсене вăхăтлăх пурнăçлакан О.Николаев пулнине аса илнĕ май чылай ĕçлĕ самантсене татса пама май килнине палăртрĕ, çавăншăн Олег Алексеевича тав тунине палăртрĕ.

ЧР ĕçлев тата социаллă хÿтлĕх министрĕ А.Елизарова, вăрмарсемпе пĕрремĕш хут тĕл пулнине палăртнă май, тĕр­лĕ ыйтусене хускатрĕ. Юлашки уйăхсенче респуб­ликăра пулса иртнĕ ырă улшăнусем çинчен каларĕ, ЧР Аслă экономика канашĕн анлă ларăвĕнче презентациленĕ регионăн 2020-2025 çулсенчи социаллă пурнăçпа экономика аталанăвĕн Комплекслă прог­рамми çинче чарăнса тăчĕ, программăри социаллă сфера аталанă­вĕн проекчĕсене пысăк тимлĕх уйăр­чĕ. Халăхăн пурнăç шайĕ рес­публика экономикин аталанăвĕпе тÿрре­мĕнех çыхăннине каларĕ. Сăмахран, республикăра пурăнакансене хамăр предприятисенчех ĕç вырăнĕсемпе тивĕçтерсен вĕсем ĕç шыраса ытти регионсене тухса çÿремĕç /статистика тăрăх 80 пине яхăн çын ют регионсене ĕçлеме çÿрет\, апла пулсан экономика та малалла аталанать, çемьесем те çирĕпленĕç, ача-пăча тулли çемьесенче çитĕнĕ.

Пухăннисен ыйтусем сахал мар пулчĕç, ытларах вĕсем çемьесене тивĕçекен пулăшусемпе кăсăкланчĕç. Алена Геннадьевна кашнин çинех тивĕçлĕ хурав пачĕ. Тĕлпулу чыслав саманчĕпе вĕçленчĕ. Савăнăçлă лару-тăрура Алена Геннадьевна Вăрмар районĕн­чи халăхăн социаллă ыйтăвĕ­сене тивĕçтерекен комплекслă центрăн директорĕн замес­тительне Т.Григорьевăна нумай çул ăнăçлă ĕçленĕшĕн ЧР Ĕçлев тата социаллă хÿтлĕх министерствин Тав хучĕпе /сăнÿкерчĕк çинче\, çак центрти çемьесемпе ачасене пулăшу кÿрекен уйрăмăн специа­листне Ю.Степановăна ЧР Ĕçлев тата социаллă хÿтлĕх министерствин Хисеп грамотипе наградăларĕ.

И.ДАНИЛОВА.